北水頭等倉:潤啤估值有望提升

A股前日無端端急跌,仲拖累埋港股,昨日滬綜指仍低收作結,未能收復3,000點關,偏偏港股卻逆A股而行,恒指升385點,收報21,622點,國指亦反彈上9,200點樓上。

呢期玩升跌幾百點,若時而好友時而淡友的話,左一巴右一巴好快玩完!到底嚟緊係咪傳統「五窮六絕」,如果年年都係咁,就唔使用腦都可以發達啦!

到底第二季股市是否已在四月見頂,要視乎內地經濟數據能否持續改善。要知道,近月市況好轉,動力來自春節後的經濟數據改善,但到底是季節性因素,抑或中央的穩增長措施收效,現時還未說得清。

若未來一月的數據繼續改善,後市自然不用過分看淡,空倉回補更有機會為大市添動力。但若然經濟疲態再現,咁就即係上半年都唔會有咩着落。

正所謂「塞翁失馬」,華潤啤酒(00291)自失去藍籌席位後,股價未見大散,昨日更藉啤酒業務季度經營數據理想而急升6%,收報16.12元,成交2.83億元。

潤啤首季旗下啤酒業務銷量265.9萬千升,較去年同期的264.9萬千升略有增加;營業額68.53億元,同比增長1.7%;惟季內淨溢利同比卻大增4.5倍至4.42億元,主要是淡季中檔或以上啤酒銷量增長帶動營業額上升,原材料成本降低,以及銷售及分銷費用下降所致。

回試15元可翻兜

在增持雪花啤酒後,潤啤的盈利基礎有望得到進一步提升,有利中長線估值。筆者在三月底曾推介潤啤,當時股價在14元水平,目標16元昨已到價。若是浪受阻於17元水平,可先獲利回吐,待回試15元承接再睇位翻兜。年內若有併購或市況利好作配合,以大成交突破18元關的話,無限風光在後頭。

司慕渢