絲絲講場:星港生活貴絕全球

外媒howmuch.net根據《經濟學人》雜誌早前公布嘅《全球十大城市生活成本》調查,總結出十個城市最適合邊類人居住嘅指南。整體嚟講,新加坡同香港物價係全球數一數二!

紐約油平 首爾酒價高

呢十個城市相互比較下,howmuch.net總結出不同人士應該點樣選擇在邊個城市居住嘞!事實上,香港地少車多,過去十年香港油價一直係十大城市中最貴,每加侖約6.55美元(約51港元),所以電動車市場喺呢度絕對有發展潛力。

若想慳油錢,可考慮移民到紐約,因油價係咁多個城市中最平,一加侖2.3美元(約17.9港元)。但如果你係煙民就要考慮清楚!因一包煙要14美元(逾109港元),係10年前嘅double。若唔肯戒煙,你應該移民去首爾,因煙價最平!

然而,首爾嘅麵包同餐酒係咁多個城市中最貴,一磅麵包要6.72美元(逾52港元),貴過榜尾新加坡四倍;亦較10年前貴2.5倍。同時,首爾一支紅酒竟然要近27美元(逾210港元)!

余絲韻