絲絲講場：慘！89%打工仔每周OT

踏入四、五月，唔少公司都派晒花紅，定晒薪酬加幅，打工仔想知自己有冇跑輸大市，或者心郁郁想轉工，可以參考jobsDB個調查。話說一七年平均加薪幅度有3.9%，但最估佢唔到嘅係IT人嘅人工加幅跑贏Banker，高達5.3%，Banker加得4%咋。

雖然舊年經濟麻麻哋，但唔少打工仔今年都有花紅，個調查話53%受訪者今年平均花紅有1.5個月人工，比舊年嘅1.2倍多。除咗人工，打工仔最關心就係工時，調查發現89%受訪者每星期都要OT，每個禮拜OT七個鐘以上嘅有23%，而OT十六個鐘或以上就有3%，你係咪都係慘豬豬，冇得準時收工嗰位呢？

另外，五月打後會有大批應屆大學畢業生搵工，調查話同學仔搵工比舊年容易，依家招聘廣告比舊年同期多咗兩成。

至於畢業後要幾耐先搵到工，要視乎工種同畢業生性格。之不過，喺金融行業中，銀行見習生一職就好吃香！

余絲韻