絲絲講場：伍燕儀做Banker因「支筆」唔得？

花旗同中大商學院合辦嘅銀行課程尋日舉行畢業禮，花旗香港區總經理伍燕儀（Angel）話重返校園，令佢諗返起當年喺中大讀書嘅點滴。

原來Angel當年除咗主修BBA之外，仲副修咗新聞，爭啲就成為絲絲嘅行家。Angel話當年都有諗過做記者，喺中大新聞與傳播學院都修讀過廣告同新聞寫作課程，但就覺得自己支筆麻麻哋，決定將副修當成興趣，畢業之後就全力向銀行業發展。

講番班同學仔，Angel就話好欣賞佢哋嘅創意，笑言自己玩facebook等社交平台唔夠佢哋咁厲害，仲話花旗會認真考慮，實行同學做專題報告嘅建議，好似喺花旗旺角分行大樓外，整番個QR Code（二維條碼），吸引途人注意，順便增加花旗官網嘅瀏覽量喎。

余絲韻