交易所你聽得多，最新嘅「Donkey Exchange」你聽過未？
中國人乜都可以炒，大大小小嘅交易所遍地開花，內地交易所數目由一一年嘅300家急增至現時超過1,000家，交易嘅嘢除咗農作物、金屬、能源同酒呢啲正路嘢外，仲有蘭花、郵票同收藏卡，估唔到連驢仔都有。
喺內地，驢仔被視為農產品之一，用嚟補血嘅阿膠就係驢皮煮出嚟，過去十年阿膠需求急增，驢價水漲船高，但驢仔繁殖慢，勁渴市。以山東為基地嘅驢仔交易所就喺舊年十二月面世，仲好傳統咁用電話交易，有農民打去話自己有一群驢仔想賣，交易所就會派人去確認數量同品質，再幫買賣雙方拆掂交易價。
不過多未必好，交易所良莠不齊，加上監管麻麻，都有發生過攞完錢走佬。亦有人批評，好多交易所最終變成投機炒賣嘅平台，對實質經濟作用唔大。
余絲韻