絲絲講場：輪王翁世權復出 兩牌在手
輪王輪后重出「缸」湖！翁世權（Simon）上年加入咗歐資公司Vontobel（瑞萬通博）擔任執行董事兼香港上市產品銷售部主管，計劃喺香港新開輪枱，第一步就係幫公司申請證券交易牌照。第一季完結前Simon有好消息，證監會發咗「證券交易」同埋「期貨合約交易」牌照畀佢哋，恭喜恭喜。
輪后葉文炘加入招證
有證監會牌照只係第一步，距離佢哋要喺香港發行第一隻窩輪仲有一段路，包括要取得港交所批准，及要測試系統、風險管理措施等，至少要多一年半載。Simon話「嚟緊工作應該會更繁重，好唔捨得放長假嘅悠閒，同埋投資不受拘束。」佢話第一季個人投資成績唔錯，仲有玩牛熊證添，但公司同自己攞到牌後，就要跟番監管申報，投資難度大大提高。
另一方面，「輪后」葉文炘（Abbie）上年年底離開瑞信，去向當時未講得住，依家終於公開得，原來佢加入咗招商證券，擔任證券板塊金融產品部董事。
幾時可以出輪？Abbie話逐步嚟，所有嘢準備緊同建立系統。咁粉絲咪有排都見唔到Abbie講輪？又未必，早排佢放假參加咗唔同嘅跑步比賽，畀啲相大家止止渴先。
余絲韻