Market Insight：支付股實不宜高追

中國經濟數據及人民幣走勢仍係關注重點，如果繼續緩慢下滑，投資者亦難言對股市有信心。

板塊方面，炒來炒去都係電訊設備股，昨日又有瑞聲（02018）及通達集團（00698）有大行護航一唱就起。不過，該板塊亦係大行的禁臠，行業消息及公司動態永遠都係分析員得到第一手情報，所以今次之升浪甚少能益到散戶。

強勢股亦未必穩陣，好孩子（01086）股價創五年新高之後，突然連跌四日，昨日更插水近兩成，消息指是下調業績指引。不過，間公司可算是內地企業海外併購之模範，先後收購歐洲及美國的嬰兒車品牌後，由一間代工生產的工業股變身成為歐美品牌商，最主要係一條龍式服務。

海外併購鮮有成功

至於海外併購的失敗例子則多不勝數，最明顯係聯想集團（00992），買完「冇得撈啦」衰多兩錢重，股價低見4.5元後反彈，但昨日已有「完成反彈」味道。

近日有TCL通訊（02618）提私有化，公司○五年以換股方式收購與法國Alcatel合資公司的權益，雖然亦經過虧損陣痛及重組，但以Alcatel品牌專攻海外的低端手機市場後，一四和一五年均大賺10億元以上，可惜好景只得兩年，敵不過手機智能化浪潮，今年首季純利大跌92%，此時提出私有化相信小股東樂意接受。

併購呢條路的確相當難行，唔係買咗個品牌就算數，仍要不斷重組及創新，聯想一直靠廉價及低毛利率去競爭，可能扭虧日子要不斷延長。

每項新科技在取得成功之前都要先經過無數次失敗，Apple Pay公布進軍香港，目標是小額支付市場。Apple Pay推出一年僅佔美國1%市佔率，除了老對手Google之外，今年進軍中國亦遇上支付寶及微信等地頭龍，來香港當然要撼八達通。香港一向被抨擊在移動支付落後，但其一原因是八達通實在太方便，Apple Pay要普及可能來日方長。

百富6蚊邊可小注

不過，Apple Pay登陸消息昨仍帶動一眾支付股，最明顯是賣POS機的百富環球（00327）。早前Apple Pay公布進軍大陸，百富亦炒過一輪，但其後股價一路積弱，連6蚊呢個終極低位都一度跌穿埋。

其實百富業績冇乜問題，只係POS機因競爭關係一直跌價；市場方面，海外保持理想增長，但中國市場令人失望，只係勉強維持10%左右與市場同步增長，結果成為沽售藉口。睇番公司PE得10倍左右，照計已經夠平，外資及本地證券行大多唱好，但一路唱好卻股價一路跌反而覺得有景轟。無論如何，依家市況高追就咪搞，若有機會見番6蚊附近小試則無妨。

古勝