二手iPhone 6售價難飆

旺角先達恒訊手機維修阿洋指出，「Apple Pay係方便，但係Andriod機之前有P2P過戶功能，而iPhone冇；依家推Apple Pay，人哋冇，咁咪當拉上補下。多咗呢個功能，應該會留到舊客，但唔覺得會吸引到新客。」

但對iPhone機價，阿洋表示，「Apple Pay對二手機機價應該冇影響。而我亦唔覺佢會牽起一輪iPhone炒風，始終iPhone有冇得炒，都要睇內地有冇賣！」

iPhone 7有得炒

旺角先達G-World東主Lo哥指，「推出Apple Pay，iPhone二手機應該會好賣咗，但係個價就唔會加喇！而對iPhone 6或iPhone 6S嘅新機銷量則冇幫助，啲人唔會因為想試呢個新功能，而走去轉機。」

至於iPhone 7，Lo哥續指，「新款再加埋用到呢個功能，應該幾掂！估計iPhone 7會有得炒，始終限量發售，一定唔夠賣。不過，炒幾耐主要睇部機嘅新功能有幾吸引，照計會炒一至三個月。」

iPhone用戶 點睇Apple Pay

唔吸引冇新意

中大系統工程二年級生Stanley：「Apple Pay唔吸引！手機付費唔算潮流。雖然我自己係『果粉』，好鍾意iPhone又靚又易用嘅介面同流暢度，不過，見佢近幾次推嘅新功能都大同小異，新款亦只係將部iPhone拉長縮短，冇咩新意。所以，如果之後出嘅iPhone 7都係咁，我可能會轉其他牌子嘅手機。

幾方便會嘗試

樹仁經濟及金融系三年級生Stephen：「我有啲擔心會洩漏個人資料，但係Apple Pay真係幾方便，所以我會試！我幾鍾意用iPhone，都用咗幾年，依家多埋呢個功能，有多個原因叫我繼續做『果粉』。」」