絲絲講場：投行打工做併購最好景
又聽到話銀行裁員，銀行工真係冇得做？又未必，睇你做邊瓣。喺香港投資銀行入面專做合併收購（M&A）就最好景，舊年人工升咗14%！人工加幅係區內最勁。
國際人力資源顧問公司Robert Walters最新調查發現，投行做M&A年資至少有6年嘅，舊年年薪升14%，去到160萬元（即月入大概13萬），標青啲仲可以上到年薪200萬（月入約16萬）！3至6年經驗嘅，最勁加6.7%。年資少過3年但表現好嘅都加11%，年薪達78萬（月入6.5萬），仲未計花紅。
債券融資薪酬反跌
做M&A咁好景，係多得內地企業爭住「走出去」買買買帶挈，所以識講普通話嘅，同埋識做Deal嘅新仔就最搶手，投行除咗擔心畀私募基金挖角外，仲驚班Deal-Makers自立門戶搞併購爭生意。
咁最灰係邊瓣？似乎係債券資本市場（DCM），即係搞債券融資，新仔人工舊年普遍跌咗5.7%至年薪66萬（月入約5.5萬）。至於做股票市場嘅Banker，即係做證券融資嗰班，人工就冇乜點變。
余絲韻