絲絲講場：小加講股火不離口

絲絲自問好勤力，一直有追開小加總裁嘅金句，直頭當係「譬喻教室」咁咪。

好似二○一○年時，大家講緊「小QFII」，即是海外人仔資金透過本港中資證券行同基金公司，有限度咁投資內地股市債市，等人仔可以多個途徑回流內地。當時小加要解過畀大家知，呢個回流機制有幾咁重要，就搞出個「魚水論」，話人仔流量係「水」，人仔產品係「魚」。

金句譬喻畀足心機

舊年八月，小加講到「滬港通」，佢就話香港代表嘅國際市場係「方形水管」，但內地係「圓形水管」。一個方一個圓，咁點算？所以咪要有「滬港通」做兩者嘅接駁轉換器囉。講到咁，你都唔好意思話唔明吧。

不過最近，小加少咗講「水」，開口埋口都講「火」，好似上個月底內地亞布力中國企業家論壇，好多人批評中央粗暴救市搞亂規矩，小加即刻話屋企火燭，救火要緊，仲理得姿勢？

話口未完，只係隔一個星期，佢尋日喺新加坡一個商品論壇上，又再講「火」。今次講到中港股市「互聯互通」好似冇晒聲氣，小加就話，場火剛啱撲熄，係都冷靜吓，睇點清理現場，點會即刻傾買新梳化新窗簾！嗱嗱嗱，開口埋口都講「救火」，係心裏有團火？定心裏有鬼……哎，唔講呢啲，農曆七月仲未過……

余絲韻