絲絲講場：黎大鈞無帶走億元股份？

數碼通（00315）前總裁黎大鈞上月底離職前，講過「走就係走、放手就放晒」，佢幾咁瀟灑，唔通連持股都一樣Style？港交所股權披露資料顯示，黎大鈞八月三十一日申報持股由0.72%大幅跌至0.05%，「減持」睇落似係因為佢未有行使值過億元嘅Options（購股權）。

睇番兩份上周五嘅申報，黎大鈞喺八月三十一日曾以每股行使價12.78元購股權，獲得50萬股數碼通；仲有另外714.5萬股，尋日收市價計值成1.04億元，就喺無任何作價情況下申報為「減持」。睇番年報，呢批「減持」，咁啱就係佢一一年所獲購股權嘅餘下部分。

黎大鈞喺六、七月時都有行使過購股權，股份仲即時賣走，帳面賺超過189萬元。

但今次睇嚟，佢似乎無把握最後機會行使所有購股權，究竟佢係同公司「講心唔講金」？定點呢可？

黎大鈞已經唔再係數碼通董事，持股比例亦遠低於披露要求，佢第時會唔會再買賣數碼通股份，睇怕外界好難知。

余絲韻