絲絲講場：股神暗撐「滅人武器」
股神巴菲特捐身家出晒名，咁啲錢捐去邊，你又知唔知？唔知好正常，是關有人收到捐款，都唔可以同人講「我哋收咗巴菲特錢」。紙點包得住火？呢個世界有報稅表呢樣嘢，好多「不能說的秘密」都會曝光，連埋醫學期刊啲蛛絲馬迹，爆出股神家族一直暗撐開發「滅人武器」。
呢樣嘢雖則會滅減人類，但主要用嚟對付蟲蟲，呢樣武器就係子宮環，斷估你唔係佢要對付嘅嗰啲蟲蟲，所以唔使驚。
研發平價子宮環
唔講未必知，股神一直好支持計劃生育，認為女性有生育自主權，咁先有利經濟。子宮環雖然有效避孕，但係唔平，未必個個負擔到。於是股神家泵水支持研發又平又安全嘅子宮環。
捐錢做好事，都要隱姓埋名兼封口？梗有原因。話說股神打骰嗰間巴郡，啲小股東以前可以揀將賺到嘅，交畀股神代捐出去，但由於部分會捐去研究控制生育嘅機構，激嬲咗啲反對控制生育嘅激進分子，示威不單止，仲會杯葛、甚至攻擊巴郡其他生意。
至少捐咗九億元
怕咗佢哋，巴郡由二○○三年開始就取消呢個小股東捐款安排，而股神就靜靜雞繼續捐。股神家族基金投放入計劃生育嘅資助同研究，見得到嘅都捐咗至少9億幾港元，仲未計收得好密嗰啲。
地球上，賺錢叻嘅人好多，賺到又會行善嘅亦唔少；但能夠做到慳自己，然後成副身家咁捐出去改善社會，仲要低調封口嘅，就冇乜幾個。
余絲韻