絲絲講場：沈大師唔認燈神「我有九成準」

貼中股災阿爺托市

沈大師年初由玄學角度預測全年個市。燈神要平反，梗要檢視佢嘅戰績！

佢講過今年四月五日至五月五日屬「庚辰月」，天干屬金，庚金乃強金，助升市，不妨進取啲入貨。絲絲睇番，四月八日復活節假之後，港股又真係跟A股爆升，仲喺四月廿七日去到高位28,589點添。

大師講過六月六日至七月六日屬「壬午月」，天干屬水，但地支屬火，呈水火交戰局，話股市易招損失。結果？咪中港齊齊股災，阿爺全方位托市，大媽們對住股價牌齊唱「起來不願做奴隸的人們」，咁仲唔係「水火交戰」局！

七月七日至八月七日屬「癸未月」，大師話天干屬水，加埋夏天就快完，火嘅旺氣漸退，個市或會急跌。又確實，七月八日港股曾急插超過2,000點，跌穿24,000點，雖則之後幾日反覆上番25,000點樓上，但近日又跌番落嚟「冇翻身」。

屈指再算十月見頂

之前嗰啲又幾準，之後又點？沈大師話上星期六「立秋」入「甲申月」，屬金剋木局，個市會逐步回升，又話本月財星到，叫吸納吓屬金嘅股份，即是內銀內險類喎。

大師又話九至十月恒指有機見頂，十月或係最後一擊，保住老本過寒冬咁話。跟唔跟？絲絲先此聲明風水術數並非精密科學，你大個仔大個女(o架)嘛。

余絲韻