利豐（00494）以往幾年都喺中環文華東方開股東會，尋日首次縮皮退隱返荔枝角總部搞。呢個時勢，慳儉應該抵讚；不過，班董事人工連酌情獎金真係好豐厚，「太子爺」兼CEO馮裕鈞（Spencer）加咗67%，主席馮國綸（William）都加咗25%，咁絲絲就唔明喇。嗱，William尋日有解畫，佢話利豐比其他上市公司，董事袍金一啲都唔高喎。
今次，由William與Spencer兩叔姪首度主持股東會。今年Spencer正式擔大旗，佢阿爸兼利豐榮譽主席及非執董馮國經（Victor）全程「傍實」未有發言。
慳家利豐返番自己主場開股東會，一班去慣文華東方嘅小股東，今年要山長水遠踩入荔枝角都無詐型。佢哋唔滿意嘅反而係股價，有小股東尋日慨嘆，喺呢個「港股大時代」，利豐股價咁都升唔起，好失望咁話。
William就自言公司業務舊，家陣啲投資者睇互聯網股多，即使無錢賺都好多人捧場；佢又話利豐雖然喺消費品供應鏈地位不變，但都要睇吓點適應互聯網時代，又話相信Spencer呢一代年輕管理層好有能力帶領公司咁話。睇嚟今年利豐真係要諗吓計仔，去應對市場挑戰。話時話，阿叔咁講，係咪即係話「以往睇你喇Spencer」呢可。
余絲韻