絲絲講場：港股大時代 經紀挖角畀多4成

近排個市熱成咁，除咗股民袋袋平安外，亦帶挈埋班金融從業員身價水漲船高，證券行紛紛出現跳槽潮。絲絲聽聞，有證券行最近呢個星期，每個部門平均都有兩、三個包括主管級在內嘅遞信劈炮，過檔去其他證券行。

做揸Fit人年收最少兩球

傳聞某中資大行近期大手筆挖角，有幾大手筆？聽住喇。除負責人員（RO）、財務總監（CFO）等閒閒哋有月薪十萬元，普通客戶服務人員都有兩皮半（2.5萬元）外，仲講明至少有九個月花紅。計吓數，咁啲證券行RO、CFO咪最少一年有兩球（200萬元）收入。

港股大時代係咪真係咁好景呢，絲絲唔知，不過，港股真係好耐未試過好似依家咁旺場，每日唔過二千億元成交好似有問題咁，喺券行做嘅每日承受勁大壓力，有番啲補償係好應該嘅。絲絲都好似係喎，老細，收到嗎？

有消息話，金融業呢期真係好活躍，超多Offer，人工又畀得起。有證券行職員直頭同絲絲講，依家個市咁旺，跳槽個「起跳價」起碼要高依家四成。

花紅嘅行情又點？由於好多行一般四月初先發放上年度花紅，所以剛發嘅花紅並未反映今次中港股市狂牛。

余絲韻