絲絲講場：白紀圖退休讀書學「藝」

太古（00019）尋日公布全年業績，適逢係主席白紀圖嘅Last day，絲絲當然要八吓佢嘅去向啦！原來佢並冇選擇退休歎世界，反而重拾書本，回歸校園噃！

擔任公司主席8年嘅白紀圖正式退下火線，尋日佢喺業績記者會上表示，喺太古工作超過35載，卸任後將會離開香港一年，返英國修讀藝術史，然後再搵新工，唔知新工會唔會同藝術有關呢？問及佢仲會唔會返嚟香港，佢就話都有機會，不過就未必會從商喇！

經過今個星期港機工程（00044）、國泰（00293）以及太古、太地（01972）連串業績會後，白紀圖終於完成歷史任務，交棒畀史樂山！絲絲翻查資料，原本係太古CEO嘅史樂山資歷原來同白紀圖不相伯仲，佢亦喺太古服務將近34年，唔知太古系喺佢嘅帶領之下會走向一條點樣嘅發展道路呢？

余絲韻