- on.cc 東方互動主頁
- 3月29日 (六)
係人都想又後生又有錢，除非你天賦異稟，有非凡嘅創富能力，否則就要識投胎，搵到個有錢老竇。《福布斯》全球億萬富豪榜早幾日出咗，個個留意邊啲富豪係十大，原來個榜有個亮點，中國出咗個史上最年輕富豪，佢就係24歲嘅紀凱婷。
紀凱婷呢個名喺財經界好陌生，原來佢係舊年年底至喺香港上市嘅龍光地產(03380)主席紀海鵬個女，紀凱婷依家亦係龍光嘅非執董。
紀小姐係通過唔同公司，同埋家族信託，持有龍光地產85%，《福布斯》話紀小姐嘅身家總共有成13億美元（約101.4億港元）！年紀輕輕就已經成為榜上最年輕富豪，仲取代埋Facebook聯合創辦人莫斯科維茨（Dustin Moskovitz）。咁巴閉，多得老竇唔少喇！
不過紀小姐就好低調，想搵番張佢嘅相都難過登天！皆因公司只係上市咗幾個月，佢又好少出席公開場合，如果唔係公司上咗市，真係冇乜人知佢咁巴閉。
同佢一樣，年紀輕輕就做富豪嘅，仲有○七年上市嘅碧桂園(02007)太子女楊惠妍，佢又係超級低調，如果唔係結婚，真係冇辦法睇到佢嘅廬山真面目。總括而言，如果你有個喺內地做房地產嘅老竇，唔單只贏在起跑線，對跑鞋仲加咗超級Turbo添。
余絲韻
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
