高盛同世界銀行罕有聯手，推出新基金，唔係投資科網或者金融，係想幫一班發展中國家女創業家，等佢哋有錢發揮所長，進而推動發展中國家經濟發展。
目標唔算誇張，只係籌6億美元，對象係10萬名女創業家。高盛將注入3,200萬美元種子基金，並提供1,800萬美元為當地女性銀行家和商家提供本土培訓。
呢個構思來自高盛，佢哋本身有個名為「10,000女性」嘅計劃，過去六年為一眾女創業家提供培訓，後來發現參加者除希望獲得從商建議外，仲希望獲得資金協助。
高盛喺做善事方面都算唔話得，前年就捐出2.41億美元，係美國第四大慈善企業，頭三位係富國銀行、沃爾瑪同雪佛龍之後，再前一年更加係排名第二。不過，高盛咁做都唔係無私心，皆因華爾街大行喺金融海嘯後臭名遠播，頻頻做善事部分原因係想幫公司嘅貪婪形象洗洗底。
雖然高盛對上述基金嘅捐助相比女創業家面對嘅資金缺口只係杯水車薪，但佢哋肯出一分力，點都值得支持。
余絲韻