絲絲講場：小米學「星星」隊啤食炸雞

近排全城陷入「星星」韓劇熱，亞洲各地少女、少婦都身中「劇」毒，絲絲都唔例外，呢股韓風仲吹到去內地小米公司！話說劇集大結局前一晚，小米飯堂貼出通知，話如果男女主角無大團圓結局，第二日公司就會提供免費啤酒同炸雞，以示安慰！

最後劇集雖然只係半Happy ending，但小米都照請員工食炸雞、飲啤酒，當係慶祝旗下小米2S減價而喺市場熱銷喎，仲話員工飲醉咗可以放工返屋企添！

話說呢套韓劇嘅女主角好鍾意一邊睇電視，一邊飲啤酒、食炸雞，仲叫男主角深夜落街買畀佢食，搞到唔少瘋狂粉絲照辦煮碗，叫男友跟住劇情做！

呢次小米食正條水，透過請員工飲啤酒食炸雞，一下子將公司形象提升，仲有啲外國科網公司嘅「貪玩」影子，小米公關真係非常醒目！據講尋日員工勁飲勁食，Canteen人頭湧湧。

尋日小米嘅2S手機減價400元人民幣，一眾粉絲即刻瘋搶，搞到要停售三日，公司話為咗慶祝，照請一大班員工食炸雞啤酒。官方微博仲話，老板雷軍落咗指示，如果邊位「同學」飲醉咗，下晝就唔駛開工，員工們真係開心啦！

有小米粉絲仲喺雷軍微博留言，問佢仲請唔請人，睇嚟簡單一盆炸雞同啤酒就做到宣傳效果，真係抵到爛！

余絲韻