絲絲講場：信置上下懷念開國元老
本港地產界剛剛失去一位受人尊敬嘅老行尊！信置（00083）老臣子兼開國功臣楊南國（Tommy），上月十七日離世，享年73歲。
楊南國半生奉獻公司
信置主席黃志祥向公司內部發出訃告，對於Tommy離去深感悲痛，盛讚佢忠心服務集團，對工作熱誠投入，為人勤奮，對集團發展貢獻良多，將會永遠懷念佢。
Tommy唔止半生奉獻畀公司，佢嘅大仔楊文早年亦曾隨父効力信置，近年先轉去新世界發展（00017）出任營業及市務總監。
楊文形容父親仁慈、樂於助人、兼且多才多藝，既係出色嘅高球手，又有藝術天分，畫畫、寫作、唱歌難唔到佢，佢嘅幽默感帶畀屋企人好多歡樂。
人所共知，Tommy喺業界同公司內地位崇高，但為人隨和，喺後輩同下屬面前都毫無架子，係行內出名嘅好好先生。佢早於一九八○年隨信置創辦人黃廷方由新加坡來港打天下，服務公司34年，去年底退休，今年開始轉任集團顧問。
余絲韻