絲絲講場：萬科豪宅起到曼哈頓
內企走出去係大勢所趨，喺房地產商方面，最積極應該係SOHO中國，萬科集團都唔弱，佢哋喺紐約嘅項目動土喇，萬科集團總裁郁亮、副總裁張旭齊齊去動土。
名建築師親自操刀
佢哋第一個項目喺三藩市，紐約曼哈頓610 Lexington Avenue（列克星敦大道610號）係第二個，今次係同美國地產商RFR、Hines合作。項目位於紐約老牌商業和高尚住宅核心地帶 ―― 曼哈頓中城區（Midtown），樓高200幾米，共61層。
郁亮仲話，呢個項目由著名建築師Norman Foster親自操刀。絲絲記得Norman Foster嘅大作，包括香港滙豐銀行大樓、香港機場、柏林德國議會大廈改造等。
據絲絲所知，呢一區嘅建築，好多出自名家，例如Miesvan der Rohe、Philip Johnson等。
據講，列克星敦大道610號項目將於明年秋季啟動預售，一七年開始交付。依家咁多內地富豪喺海外置業，話唔埋好多華人買家呢。
余絲韻