絲絲講場：李彥宏「認老」搞網為興趣
互聯網果然係年輕人嘅世界，四十五歲嘅百度公司創始人、董事長兼CEO李彥宏（Robin）都嫌自己老，仲拖埋阿里巴巴創辦人馬雲，同埋騰訊主席馬化騰落水添。
李彥宏啱啱至升級為內地首富，證明大把「錢」途。尋日佢嚟咗香港出席論壇，大談互聯網發展，佢話人嘅創造力最高峰係喺三十歲之前，如果佢同啲手下傾大計時，反而會聽佢哋後生仔嘅意見去做，佢自爆今年已經四十五歲，加埋馬雲、馬化騰，其實都已經過咗，講白啲，即係out咗。好彩佢依家係為興趣，唔係為錢。
網企「獎門人」豪派錢
尋日好多老外嚟聽論壇，Robin醒咗兩招畀佢吔。佢話，無乜外國互聯網公司喺中國發展成功，原因係佢哋並無真正將中國作為一個獨立嘅市場來研究。
近呢兩年，內地嘅互聯網金融、電商嘅發展真係幾嚇人，上個禮拜絲絲聽聞佢哋年尾花紅超勁，就連搞聯歡會，啲老細都好闊綽，又肯放下身段，扮鬼扮馬搞下氣氛，同班手足玩到癲，無他嘅，呢行咁大發展，留住人才好緊要。
京東老闆劉強東就着到成個許文強咁同員工聯歡，不過，最氹到員工開心嘅唔係劉總嘅扮相，而係佢帶住上台，準備用來畀大家抽獎嘅一百萬人仔現金。
絲絲記得當年阿里巴巴主席馬雲，以白雪公主look娛賓，仍然記憶猶新，今次劉強東雖然打扮唔夠出位，但誠意搭夠。不過，講到豪，360公司就更勝一籌，喺年會派出獎金同獎品加埋近二千萬人仔，真係恨死隔籬。
余絲韻