唔經唔覺，「蘋果教主」喬布斯離開果粉已經兩周年。Apple近排開售嘅新iPhone銷量就好壞參半，iPhone 5s都係靠「土豪金」帶起銷量，但同時發售嘅iPhone 5c就無乜人吼，令唔少炒家蝕本離場。絲絲認為再咁落去，現任舵手庫克（Tim Cook）個位都唔係咁穩陣。之不過，庫克當然亦知道自己有幾大危機，所以專門針對外間批評佢缺乏創意呢點去諗計。
係果粉都記得教主喬布斯當年推出第一代iPhone時話過，Apple嘅產品唔止係一件電子產品，仲係一種生活態度，一個字講晒就係要「潮」。唔怪之得，Apple繼今年七月挖走法國時裝品牌YSL嘅前CEO Paul Deneve擔任副總裁之後，啱啱又向英國國寶級時尚品牌Burberry埋手，挖走埋佢哋嘅CEO Angela Ahrendts明年春季加盟做副總裁啦！
庫克喺前後三個月左右，就向兩大時尚品牌埋手，挖走佢哋嘅CEO加盟，兩人今後會直接向佢匯報。消息指阿Paul仲會執行一項特別計劃，而Angela就主力負責零售同網上商店部門。市場估計兩位時尚品牌潮人首項任務會係將iWatch嘅銷售，將佢打造成奢侈品嚟賣。
Apple呢項挖角舉動當然引起唔少人嘅注意，仲有消息話Apple設計部門員工由300人增至600人，有分析就估，庫克係想將旗下產品升級至名牌時裝嘅品位，走高檔市場路線，無意同三星留喺中低檔市場較勁。
有人仲留意到，Apple往往將零售店開喺LV等名店附近，依家仲連續挖走兩大時裝品牌嘅CEO，真係似想話畀人知，佢嘅產品同名牌手袋一樣咁矜貴。
余詩韻