Market Insight：券商股現價收集

翻看歷史，一九二九年十月二十九日，道指重挫13%，一九八七年十月十九日，道指單日錄得23%跌幅，到○八年美國次按危機，又係十月，道指一個月之內跌掉27%。儘管古勝對八七股災已經印象模糊，不過一到十月，總有多少心緒不寧，既然賭場日日開，唔爭在等多兩日睇埋美國黨爭點收科至算。

期指炒家靠邊站

隔晚美股先跌後拗腰倒升收市，樂觀的氣氛也影響港股，恒指並無受中國九月出口數據差勁影響，昨日港股升118點報23,336點，新地（00016）補貼買家DSD及BSD，九龍站豪宅天璽即賣個滿堂紅，仲玩到加價再加推。特區政府見狀，講到明辣招唔會撤，免得樓市炒風復燃。地產股腳軟，尚幸昨日滙控（00005）及友邦保險（01299）兩隻金融股貢獻大市47點，抵銷地產股對恒指的影響。

古勝冇點你2013/10/16

萬里長空

個市昨高開後，查實幾悶，連期指都係得三萬五張成交創今個月新低，期指炒家在未知美國開大開細前，都揀靠邊站也。值得一提，三四線蚊型股炒得幾癲吓，埋單計33隻股票升幅超過一成，唔少仲係平日不見經傳之輩。上星期，缸邊傳小米會入股先思行（00595），昨日股價早市一度爆升八成去到1.26元，即使澄清小米無磋商入股，仲要升27%，收報0.89元。

昨日股仔熱炒，除先思行炒到出煙外；寶威（00024）中午停牌，午後復牌話與第三者磋商認購公司股份，股價急升78%收場；上周亦有異動的中信21世紀（00241）再升13%；成內地房企殼股的萬達商業地產（00169）亦急升12%。

炒股仔量力而為

早前狂炒科網股而獲利的資金，正把握指數持續高企的機會，煲起落後二、三線股，但畢竟如今並非大牛市，未見新錢流入，只係同一批資金在場內輪流炒作不同板塊，散戶跟炒要眼明手快，量力而為，最好盡量走即日鮮，免得夜長夢多！

昨日午後有段小插曲，有份申請免費電視牌照的三間公司統統掃高，話五點三政府開PC，傍晚結果一出，社交網站即被洗版，見唔少人戥洗濕個頭兼盛意十足，未領牌先請幾百人拍落唔少劇集存貨的「魔童」不值。其實唔單止電視迷跌眼鏡，睇睇昨日香港電視（01137）有3.22億元成交額，真係賓虛咁嘅場面。

另外兩隻領牌分子，成交加埋都唔夠9,000萬元，可見連股市賓架都捉錯用神，賽果有幾冷門可見一斑，香港電視揸住23.1億元淨現金，變賣家檔（寬頻及長途電話生意）等做電視大亨的「魔童」何去何從？電視迷同昨日買錯股的勇士最想知。

內地股市一個最特別的地方，是監管當局與政府可以因應市況，隨時要新股招募活動煞車，一九九○年A股市場誕生以來，IPO（新股發行）八次叫停，拉閘最長一次正是去年十月「十八大」至今的一次。最近平安證券因為上市保薦工作問題，被勒令保薦生意停業三個月，直到十二月二十三日。陰謀論者即刻從罰期推算，IPO重啟最快會係平安夜。

憧憬年底重啟IPO

儘管是捕風捉影，不過近期的確多咗大行推測，今年三中全會前後A股IPO市場會重開，睇番券商股今浪升得唔算多，同年初高位比亦低一截，買番多少倉底，即使無着落，因為首三季業績已大翻身，目前估值應該可以企得穩，萬一真係三中全會前後傳喜訊，仲可以搵番筆橫財。

三隻券商股中信証券（06030）、海通證券（06837）及中國銀河證券（06881）之中，純睇估值或者會揀潛緊水的銀河，但結合較多大孖沙捧場的因素一併考慮，仲係睇好海通多啲。

古勝