早前美銀美林有位實習生，做到暴斃，引起唔少討論。絲絲聽聞，原來好多美國嘅銀行，喺九十年代已經好「關心」員工健康，仲以公司名義幫佢哋買人壽保險，如果員工過咗身，公司就係受益人！不過，好多銀行都「偷雞唔到蝕揸米」！
呢種人壽保險稱為「銀行持有人壽保險」，銀行可以選擇保費嘅投資方式，如果投資得當就可以賺大錢；相反，如果投資失誤嘅話銀行就要蝕錢！絲絲聽講，銀行家好唔鍾意承受高風險，所以當時摩根大通衍生產品部就諗咗個方法，只要銀行畀一定嘅費用，就可以將風險轉移畀摩根大通，期限通常就係未來30年。
當時好多銀行都好Buy呢個解決方法！不過，近年市場對長期投資嘅限制愈嚟愈多，銀行要畀更多資金去做長期交易，加上班員工個個都好長命，搞到銀行嘅負擔愈嚟愈大，仲搞到銀行嘅利潤受影響添呀！
現代人長命咗，有好多原因，但投行工時長就係人都知，而且唔係咁啱現代人開始追求平衡生活嘅態度喇。近排招聘公司eFinancial Careers個調查發現，唔單止香港，原來差唔多八成嘅新加坡銀行從業員日日都要OTo架！
余詩韻