炒股要留意國策，否則會輸死，好似早前內地政府提倡節儉，三公消費（用公款出差、買車及宴客）即刻收斂晒，相關概念股跌過不停，好多仲因為咁要發盈警，最終業績都受影響。
尋日內地又有新政，就係要各級政府部門用正版軟件，禁絕老翻，唔怪得之幾隻相關嘅軟件概念股，忽然逆市升喇。
為咗禁老翻而出《政府機關使用正版軟件管理辦法》，內容大致係要求各級政府機關用正版軟件，防止老翻流入。內地老翻軟件遍地開花，今次由政府部門率先禁老翻，牽涉嘅部門數量真係唔講得笑！
份文件又提到，唔同單位部門都要負責執行，工業和信息化部監察軟件質量，督促供應商做好品質同埋售後服務；財政部管軟件採購嘅資金；審計部門睇住採購軟件嘅錢用得恰唔恰當，要寫入審計報告；工商部門就做執法，要查處軟件市場嘅壟斷同埋不正當競爭行為。
講得咁細緻，睇嚟唔係得個講字，大家一齊向尊重知識產權目標出發。
余詩韻