Market Insight：零售股避之則吉

睇住這幾天，內地公布九月製造業PMI反彈到49.8，接近50盛衰分界線水平，薄熙來被雙開，加埋十八大落實於十一月召開，以為不明朗因素盡除，可以炒鑊勁的，昨日市況確是意外地平淡。

原以為芬佬會趁眾多不明朗因素解除，第四季一開波risk on沽防守股買高beta股博食尾胡，點知只係得電訊設備股比較標青，最弊係公用、房地產信託基金（REITs）等高息防守股，出奇咁強勢，後市睇怕仲係有暗湧。

放大圖片

放大圖片

名店人龍不復見

內地黃金周假期，今年對於香港零售業，顯然有含金量不足之嫌。賓架界在whatsapp瘋傳的幾張相，顯示黃金周下，彌敦道金舖小貓三兩隻，廣東道名店人龍不再，反之大嶼山貝澳營地卻是人山人海。統計顯示十‧一當日到港旅客有12.5萬人，按年跌6%，令人擔心，剛剛先將黃金周訪港旅客增長由預期上升20%，調低到上升15%的貿發局，仲係過於樂觀。

幾隻基金聚焦嘅零售股，股價從五、六月的低位已經累積反彈唔少，近半個月先以半條直路追過頭的景福集團（00280）升幅高達116%、六福集團（00590）升90.6%、莎莎國際（00178）升38.3%以及周生生（00116）升35.3%，主要係芬佬押注本地專攻遊客生意的零售股，有機會學澳門博彩收入增長一樣，呈現谷底反彈。

地產股揸得安心

近期ZARA搶佔H&M中環旗艦店舖，據聞月租近1,200萬元，難以想像今日香港仲有多少零售生意，可以負擔每日40萬租金開支。毫無疑問，以產品平均售價，金飾股最有條件捱貴租，也因此近月的反彈浪中，升幅最大，但看來黃金周銷售令人失望的機會極高，昨日唔少大孖沙已經唔等黃金周銷售數字出來，先鎖定既得利潤，未來幾日，看來仲係避之則吉。

香港四日假期，本地地產商賣樓成績出奇咁好，新地（00016）售出超過330個單位，長實（00001）入場費達4,000萬元的的豪宅盤珏堡，最後四個單位賣清，信置（00083）及恒地（00012）分別售出30及60個單位。多得美國聯儲局零息政策，通街平錢等人借，特區政府新措施亦都如泥牛入海，不為買家所動，展望幾隻土儲豐厚的大型地產股，繼續有資產重估條件，看官可以放心繼續揸貨等收成。

美國最大互惠基金Vanguard Group，前晚宣布將六個國際指數基金，5.4億美元資產，由現時追綜MSCI轉為追蹤FTSE指數，另外，十六個以MSCI為benchmark的基金，亦一視同仁，轉以FTSE作為表現基準，目的為投資者慳錢咁話。

指數基金有改動

消息一出，編製MSCI指數及開發風險管理產品的MSCI Inc.，前晚股價在華爾街急跌兩成七，創下上市近五年來最大單日跌幅，唔好以為無MSCI指數基金，或揸MSCI Inc.就唔使理會，大行計過數，基於MSCI新興市場指數同FTSE新興市場指數的成分股差別，估計變動中，中國股市（也包括香港的H股）將會得益，錄得20億美元淨流入，其次台灣及印度12億及7億美元。

基於MSCI EM南韓屬於權重股市，今次也成重災區，估計90億美元資金要由韓股流出，變動影響會在明年初開始反映，相信到時幾隻重磅A+H股票，會因此受惠。

古勝