為咗「細價樓幾時爆煲」呢個問題，紀惠集團主席湯文亮單挑資深金融人林一鳴，場牙骹戰去到今期叫「飯局並不是免費的」。
場牙骹戰點開始？話說湯博士二月時預言「細價樓三個月內爆煲」，林博士唱反調。湯博士隨後話訂咗位八月十四日喺福臨門擺飯局，邀請林博士出席，仲話如果當日樓價指數升穿136.64點就當輸。但林博士講明唔會出席，仲叫湯博士將飯局錢捐畀慈善機構，佢亦會捐出相同金額。
尋日，湯博士就話會預留一席畀林博士，不過唔係免費，希望林贊助120本林嘅新書喎。嗱，亮點跟住嚟，湯博士話亦會送自己兩本新書畀來賓。至於捐款，湯博士話隨緣，又話佢公司紀惠每年都捐超過1,000萬，但從唔張揚喎。
尋日林博士同絲絲講，堅決唔出席，話「我去咗仲麻煩，報紙會寫得更加多，沒完沒了，想快啲完結咗佢。」咁捐書呢？佢話，人都唔去，唔會做呢個動作啦。
呢兩位博士，一個喺Blog寫，一個facebook講，喺全世界面前隔空招來招往，絲絲好難當睇唔到噃。
余絲韻