近排股友睇多過買，唔少金融財俊都話唔想掂個市住。咁有乜搞作呢？不如參考吓香港大學電子金融服務榮譽助理教授徐燦傑（Jeslie）嘅「新作」，佢最近就「撈過界」，雙線發展咖啡同燕窩批發代理，忙到踢晒腳呀！
Jeslie話，佢發現依家唔少人嘅生活品味都提高咗，優質嘅燕窩同咖啡都大有市場需求，所以就同幾位拍檔合資成立咗一間名為「女人魅」（F Generation）嘅公司，做網上金絲官燕買賣、又做埋生麝香貓咖啡（俗稱貓屎咖啡）批發等，希望可以喺年半至兩年內回本。
唔講唔知，原來佢嘅拍檔包括印尼華僑同馬來西亞華僑，對當地盛產嘅咖啡同燕窩品質較一般人為熟悉，搵貨源當然比較得心應手啦。
佢仲話自己早前專程去印尼雅加達，向一位喺 峇里W Hotel工作嘅知名咖啡專家學師，又同佢走訪當地近10間咖啡店，學習揀選同品評咖啡嘅技巧，十足十「金融界陳豪」，而依家佢每朝都會飲一杯自己沖嘅無糖無奶貓屎咖啡，話可以去水腫喎！
余詩韻