「黃金五十」早前喺一月尾時就出咗佢哋第三份研究報告嘅先行版，終極版報告終於面世。絲絲發現創辦人林奮強依然發揮大好友本色，「政府盈餘預測」同先行版比較向上修訂咗唔少，不過唯獨土地拍賣收益就維持不變。
好似利得稅、入息稅、印花稅，未來兩年嘅預測，終極版都較修訂版向上調整咗2至7.5%不等。報告就解釋，政府收入增加歸功於由一○年起嘅五年間，香港服務業出現結構性嘅強勁需求。
地產數字就似乎估得比較保守，未來兩年土地拍賣收益都係維持每年900億元嘅預測。絲絲睇番，「黃金五十」之前估上年度嘅土地拍賣收益，其實係估多咗12%，未來兩年嘅預測唔再向上調整其實都無可厚非嘅。
不過，絲絲之前同林奮強傾過偈，其實佢幾撐候任特首梁振英嘅地產政綱。梁振英喺政綱提出畀每年五千個「白表申請」可以唔使補地價買居屋，除咗加大居屋嘅流通量之外，更重要係原居屋業主鬆綁之後，可以住近啲工作地點或者屋企人，減少公共交通嘅壓力，但林奮強更加希望新政府喺地產政策可以做多一啲。
佢哋認為本港商場、商業樓面嚴重不足，政府應興建多啲。所以今次終極版報告就提議喺東涌機場附近興建一個有1,100萬方呎嘅「環球薈」，集商場、寫字樓同醫院於一身；又建議喺東涌發展一個可以容納70萬人居住嘅新市鎮「飛龍」，為環球薈提供人力等。咁多大項目，其實林奮強想講，政府有過千億財政盈餘，應該好好利用為香港增值，仲要快快行動。