絲絲講場：經紀組團新交所「攞料」

係人都知，新交所一直視港交所(00388)為競爭對手，近年無論喺交易時間、數據中心、「黑池」，以致高頻交易等發展上，都表現進取，逼到香港有些少透不過氣來。七大經紀會，今次要去新交所「取經」，其中更會主力考察當地嘅黑池同高頻交易發展、同埋當地嘅遙距參與者運作等，仲會同新交所嘅現貨及衍生產品市場負責人會面交流。

有市場人士就笑言，佢哋「取經」攞足料後，唔通想等第時返嚟同港交所就業界問題討價還價時，有更多籌碼？

與新加坡證券商交流

姑勿論目的如何，七大會都會各派出幾名代表去新加坡，故考察團隊，肯定係浩浩蕩蕩。今次佢哋嘅行程由新加坡證券商會負責安排，除咗新交所外，仲會安排佢哋同當地券商實地考察！