被視為ＮＢＡ最偉大嘅教練、手執十一隻冠軍戒指嘅湖人前教頭禪師Phil Jackson，已經話咗唔會出山執教林書豪嗰隊紐約人，其中一個理由係太忙嘞。佢依家幫華碩拍緊廣告，嗰款最新嘅筆記電腦簡直係幫佢度身訂造，就叫「禪書」（Zenbook）。
唔少球迷對禪師可能復出去帶「林瘋」隊波嘅消息，興奮到不得了，但禪師唔想再執教，因為ＮＢＡ嘅賽程好難頂，佢只想過啲健康、悠閒嘅生活，聽講佢諗緊去歐洲踩單車添。雖然禪師同林書豪無緣合作，但就接受咗華碩嘅邀請做代言人，點都同台灣沾上邊。
禪師嘅教練生涯幾乎贏晒所有榮耀，聯盟最偉大嘅球星好似佐敦、高比拜仁、奧尼爾同柏賓，統統係佢嘅子弟兵。咁有說服力，廠商點會放過佢吖。