絲絲講場：工廠請人要靠高層靚仔
內地近年繼續「民工荒」，工廠老闆大嘆請人難，工資負擔又重。咁到底除咗錢之外，工人仲會睇乜因素而決定幫邊個打工呢？
中國光纖（03777）都面對呢個難題，執行董事孔敬權同絲絲呻，當中佢就講咗句好精警嘅：「可能我哋啲管理層唔夠靚仔啦！」
培訓需時 流失率高
打工睇埋個老細靚唔靚仔？絲絲我就可能會！孔生就當然係講笑啦，佢本人靚唔靚仔就留番畀大家自行判斷喇。孔生話，由於佢哋工廠所在地石家莊，近年多咗好多知名企業，例如可口可樂，當地政府仲要幫佢哋請埋人，中國光纖要同佢哋競爭搶人，確係有啲難度。孔生仲話，佢哋嘅生產工序牽涉一定技術，所以啲工人都要接受三個月至半年培訓至返得工，但係呢段時間嘅流失率都幾高喎！
孔生希望今年可以將工人數目由目前嘅408人，增加到800人，睇嚟佢要度多啲計仔去搶人！