絲絲講場：美聯黃錦康 顯功夫「唔怕劈」
近排樓市充斥負面情緒，但美聯集團（01200）尋日仍聯同旗下四大品牌──美聯物業、美聯工商舖（00459）、香港置業及美聯中國一齊喺香港及內地開33家分行，係佢哋歷來單日開舖最多嘅一次，集團執行董事陳坤興同絲絲講，話樓市轉弱加上外圍氣氛不穩，集團未來開舖態度會較審慎。
絲絲尋日見到集團兩位副主席黃錦康及黃靜怡都有出席喺何文田嘅開舖儀式，為隆重其事，四大品牌嘅分行同時以視像聯播形式一齊進行剪綵。身為太極高手嘅黃錦康再次技癢，以前佢會劈板，今次就叫徒弟用木板劈落佢隻手，木板隨即斷為兩截，呢個表演係有意思嘅，佢想話畀大家知，近排成日都話業主劈價，但佢就無懼劈價咁話。
代理收入月減30%
其他代理亦向絲絲大呻搵食艱難，利嘉閣廖偉強話，本月公司佣金收入料有6,500萬元，按月跌逾30%，有機會成為近兩年首次「見紅」月份。
中原陳永傑亦話，香港住宅部本月佣金收入料少約30%，今年在港已增設54家分行，年底前擴充速度會減慢至只有10家。
余絲韻