借稅貸抽獎送一手建行

稅貸同生菜、舞獅都可以扯上關係?建行亞洲就話得,佢哋尋日公布咗新一年度嘅稅貸安排,搞咗一場大龍鳳,原來係想帶出「交稅易過食生菜」嘅訊息。

建行亞洲搞噱頭

佢哋請嚟舞獅採青,又用綠色嘅稅單比喻生菜,帶出「交稅易過食生菜」嘅訊息,話晒呢啲都係花臣嘢,最實際係借稅貸有乜着數。

該行高級副總裁兼消費信貸業務部主管陳詩藹(Rebecca)話,今年特設手機稅貸熱線,仲推出稅貸大抽獎添!得獎者可獲一手建行(00939)股票,用股票做獎品,唔通係要迎合香港人鍾意買股票嘅心態?而今年佢哋嘅稅貸實際年利率就低見1.95厘。

Rebecca坦言,資金成本最低嘅日子已經過去,預計第日嘅貸款息口會緩慢上升,希望今年嘅稅貸貸款額會比舊年增長三分一。

建行亞洲嘅稅貸計劃中,特選客戶嘅稅貸利率仲會打九折,最低大概1.7厘。至於將來會唔會減,佢就話依家個息率已經好吸引,會密切留意著市場走勢喎。