中信國際電訊（01883）喺上周公布咗業績，半年賺2.34億元，增長30%，公司亦好識做，尋日話會向員工發認股權，總共有4,845萬份，董事級別嘅就攞到750萬份，其餘應該係分畀高級員工，呢個比例都算幾公道。
呢批認股權嘅行使價係每股1.54元，即係話總值7,462萬元，當中一半可於明年八月至二○一七年八月行使，另一半就要等到二○一三至二○一八年先至可以行使。獲得最大份嘅當然係公司主席辛悅江，有成250萬份；執董兼行政總裁阮紀亦唔少，有220萬份；執董兼財務總裁陳天衞就有190萬份，其餘3位獨立非執董每人30萬份。
余絲韻