市場熱線：中石化具重估概念

尋日魚缸雖然下跌，但唔少股份反彈有力，最起眼嘅係零售股同飛機股。零售股繼續係主角，六福（00590）今日派成績表炒定先，同周生生（00116）齊創新高。早排景福（00280）發盈警賴租金貴，但查實公司連收入都冇乜增長，所以只係「個別例子」。

雨潤洗倉場面哄動

飛機股亦繼續做好，京滬高鐵就快通車，但呢排高鐵傳出安全問題，呢個消息比油價跌更利好飛機股，相反中國南車（01766）就冇厘精神。不過，飛機股最大嘅問題係誤點嚴重，原來話祖國飛機只要閂咗機艙門就唔當誤點，所以統計誤點率好低兼唔使賠償畀乘客，但乘客喺架機度等得耐佛都有火，如無改善遲早輸畀高鐵。

不過，尋日最令孖屐嘩然嘅係雨潤（01068）被洗倉，初時係「高佬盛」同「美人」追殺，跟住愈睇愈唔對路，逢親大行都沽，接貨嘅得大摩、法興同一眾散戶，成交金額超過28億元佔第二位，但沽空佔成交17.4%唔算多，當然可能之前已累積足夠空倉然後發難，尤其係之前人跌佢升。有傳係對沖基金學「渾水」摸魚，但公司澄清冇事發生，不過咁跌法係人都驚，食品股已牙煙，民企股更牙煙。

咁啱恒大（03333）老細當住幾百個記者講，對沖基金成日造謠沽空，仲揚言會報復。其實大鱷會睇準至出手，好似雨潤大股東揸得25%，呢排又有啲負面新聞，揀你落手並非偶然。古勝認為最佳防沽方法係回購或者增持，好似旭光（00067）、保協（03800）同敏華（01999）呢幾隻就係樣辦。

造謠通常指無中生有嘅壞事，但好似祖國移動（00941）咁樣憑一個朦朧背影同網上傳言，就炒貴幾百億市值令人啼笑皆非，尋日祖國移動回吐1.7%。藍籌股最弱仍係思捷（00330），日日陰乾式下跌。而紐約油價已跌到90美金附近，中海油（00883）亦係偏弱，但油價軟除咗益飛機股之外，對中石化（00386）亦有利，雖然根據「可加可減」機制，成品油價跟住亦可能下調，但總好過油價上升周期「加慢減快」。

憧憬新成品油機制

中石化最吸引人嘅係價錢平，往績PE得7.6倍，但令人有戒心嘅係如果油價升得太高的話，中石化又可能成為國策犧牲品。依家暫時可以消除疑慮，雖然唔保證油價不會回升，但動用儲備石油一出，油價確實受到重重打擊，另外阿爺傳出取消限車令亦有助成品油需求。

中石化股價已浮沉咗一段日子，估值低係股價最大支持力，但升得高又有國策風險。孖屐最期望今年內會出台新嘅成品油定價機制，但前提係內地通脹先受控，上個禮拜溫總講到就快搞掂，中石化既然向下風險唔高，可以博一博「重估」概念。

戰報

東岳集團（00189）+13%

帥哥上周四睇中東岳，當日低位為7.35元，以升至昨日8.33元高位計，累計賺逾13%。

I.T（00999）+12%

I.T跟隨零售股節節上升，古晨上周四推介時嘅低位係6.84元，至昨日高位7.7元計已賺逾12%。

古勝