依家中環甲級商廈租金係咁升，呎租閒閒哋超過2,200元，咁今次交易大堂續租嘅租金咪好貴？市場人士就估計呎租起碼要過100元。記得港交所喺○八年續租交易大堂3年嗰時，呎租已升至80元。雖然交易大堂租金咁貴，使用率又唔高，出市員「買少見少」，但交易大堂始終有象徵意義，尤其係用作招待各國領導人參觀及舉行上市儀式，所以仍有保留價值。
或再改裝添實用性
交易大堂總面積有45,000方呎，對於如何更有效利用樓面，就可能要花啲心思。交易大堂早年已曾經「大變身」，將出市嘅櫃枱減少，將餘下嘅面積改建為展覽館及直播室等，估計今次續約後，交易大堂或會再改裝，加多啲電視直播室，以滿足市場需求。
余絲韻