絲絲講場：新礦推介魯連城撐場
新世界發展（00017）主席鄭裕彤（彤叔）身邊有位好出名嘅「掌櫃」魯連城，冇見佢一排，絲絲尋日喺新礦資源嘅投資者推介會見到佢，今次分拆係由新創建（00659）主導，與魯生嘅直接關連性好細，佢陪埋彤叔、鄭家純一齊出嚟，證明佢好重要囉。
如果大家記得，今年初大浪西灣有工程進行，被環保團體批評話破壞環境，魯生捲入咗呢單爭拗事件，自此就好少見佢喺公開場合出現。
彤叔就唔同，佢一直都咁活躍，絲絲成日見佢好精靈咁喺唔同場合出現。呢排個股市唔係好掂，問彤叔有冇心水？佢話大市暫時都係平平穩穩啦！咁恒指睇幾多點呢？佢就話唔識喇，因為佢唔係股神喎！
彤叔又掃入佐丹奴
彤叔旗下嘅周大福密密收集佐丹奴（00709）股份，坊間傳佢會收購呢間公司，彤叔就話：「我收購嚟做乜吖，我都唔係做呢行，做乜嘢要換咗依家啲管理層？我呢啲係長線投資嚟o架！」
聯交所尋日就顯示，彤叔喺上周二又再以平均價每股7.13元掃入1,650萬股佐丹奴，涉資達1.176億元，持股量增加至18.07%；不過，彤叔就始終都唔肯講想增持到乜嘢水平。
余絲韻