如果講開大價股，中移（00941）係唔少知心股民心目中嘅儲蓄股，即係話有錢分段買，好似儲錢一樣，以分享中長線加上大方向嘅爆炸力同成果。可惜，如果大家有望一望，中移嘅股價已經跌到兩年低位，可以講係「低處未算低」，認真唔講得笑。睇番一一年，中移已經改咗名叫「中下移」，跑輸恒指都算，跑輸聯通（00762）先至大鑊。
中移為咗力保一哥地位，自然要諗計力保「領導地位」，決定來一招全國統一減價，將佢嘅套餐收費下調。消息一出就仲大鑊，減價唔一定可以帶動收入，經濟學嘅「彈性需求」都搞錯，點會有運行，睇來今年ARPU又會繼續跌。
三網融合，對後來者電訊商相對有利，加上流動商貿為大方向，邊個企喺好位自然就更加靚仔。中移依家都幾慘，小股民唔「合皮」，王董又冇嘢做到，回購股份又無晒影。當中移係公用股，我又覺得唔係咁恰當，公用股就係公用股，價格上落唔大，毋須承受市場系統風險，但係高息，中移派息4厘幾，基本上跑贏通脹，但係價易跌，心靈一樣受到創傷，近期中移又話搞流動電視，乜嘢巴基斯坦移動業務，真係星爺嗰句─「真係估佢唔到」，冇一個好策略，點同投資者交代呢？
中移向下跌已成「短暫現象」，都係嗰一句「審時度勢，見機行事」，繼續追蹤！
香港大學電子金融服務榮譽助理教授 徐燦傑