蘋果公司嘅iPhone同iPad，已攻陷咗市場，大陸呢舊肥豬肉，係好多電腦製造商嘅目標。眼見內地移動互聯網滲透率愈來愈高，內地個人電腦生產商大佬聯想（00992）馬上就推出咗「樂Phone」應戰。
早喺三月份，針對平板電腦嘅「樂Pad」亦都推出，雖然管理層無講依家反應係點，不過聯想主席柳傳志就話，佢自己想向公司買1,000部「樂Pad」送畀人都買唔到，絲絲睇嚟佢哋嘅「樂Pad」同蘋果嘅iPad真係有得fight喎！
聯想一眾管理層尋日「夾埋」，勁sell呢部「樂Pad」，柳總話對呢部「樂Pad」非常之有信心，除咗發郵件同埋短訊之外，仲可以連續咁寫字，都唔單止呀，連依家好流行嘅GAME「殭屍大戰」，都可以用全中文！而CEO楊元慶sell「樂Pad」更有一手，猛話非常易用，好似佢爸爸，個幾星期至學識用MOUSE，學「樂Pad」呢，十幾分鐘就識用喇，連佢喺外國幫佢湊仔嘅媽咪，都會用嚟睇CCTV添!
余絲韻