近年本港人民幣業務相當火熱，銀行界當然唔會放過呢個新機遇，絲絲知道恒生（00011）舊年九月成立咗「人民幣業務策略及計劃部」，個部門除咗研究人民幣業務嘅發展外，仲專幫恒生「醫治」相關業務嘅奇難雜症。
大家都知「阿爺」意願係人民幣業務可以點樣發展嘅關鍵，一有新安排出台，商家就會絞盡腦汁，研究邊啲生意做得同唔做得，如果發現一啲可行嘅「擦邊球」，快人一步推出相關業務，自然商機無限，所以嚟緊恒生都會對內宣傳呢個部門，等有同事遇到疑難時，可以有專責部門研究。
尋日絲絲就同個部門嘅主管顏劍文食飯，佢舊年先至由恒生中國嘅財資部調返嚟香港，發揮佢對內地嘅認識同人脈，往後但凡有人民幣相關新法規出台，以至查詢聯絡，恒生都會搵佢幫手研究。
話說回來，顏劍文喺上海工作過五年，咁熟悉人民幣業務，照計上海話應該有番咁上下，佢就好謙虛咁講唔太流利，皆因當地嘅同事好鍾意學廣東話，進步神速嘅反而係佢哋嘅廣東話。
余絲韻