絲絲講場：友邦杜嘉祺口密非常
友邦保險（01299）尋日第一次舉行周年股東大會，絲絲見到有嚟自馬來西亞嘅股東代表，非執行主席謝仕榮帶同一班管理層主持股東會，雖然人多勢眾，但回應股東提問時則顯得過為謹慎。
投票Demo勁搞笑
股東投票之前，作為首席執行官嘅杜嘉祺都算用心，詳細交代友邦嘅業務發展，仲準備埋投影片協助講解。不過一到股東發問環節，杜嘉祺回復番「口密」本色，對於股東最關心嘅派息問題，只回應等七月底先公布派息政策。
杜嘉祺回應其他提問時亦非常「保守」，例如有小股東問佢未來邊個地區會係最大增長嘅市場，杜嘉祺就話有15個市場，不過絲絲數手指算算，友邦喺亞太區得15個市場有業務咋喎，難道個個市場嘅增長都一樣？
股東會發生咗件趣事，話說會場安排咗啲投票機畀股東們投票，喺正式投票前都好小心咁Demo（試行）一次，但個Demo問題非常特別，問政府應唔應該增加興建醫院同學校，而結果就顯示98.75%係「否」，引嚟會場一陣笑聲。
余絲韻