企業家經常將「創新」掛口邊，但點樣「創新」呢？港交所（00388）前行政總裁周文耀就話，只要有競爭，企業家就會識得創新；而「創新」亦唔係齋坐喺度發白日夢，如何將「創新」意念付諸實行，先至係真正嘅「創新」。
其實好多人可能都覺得，「創新」就即係「天馬行空」，亦即係「發白日夢」；但偶爾發吓「白日夢」可能可以激盪思維，成日都發就變成「不事生產」o架嘞。曾任職本港交易所決策層嘅周文耀，依家係數碼港董事會主席，當然明瞭箇中嘅分別啦，所以佢出席安永二○一一年安永企業家獎典禮時，就十分強調「創新」係有時間值嘅，光想着「新」係唔夠嘅，點樣「創」才是重點。
絲絲就問，香港貴為國際金融中心，又話係活力之都，咁達唔達到周生所講嘅標準呢？原來周文耀認為香港一啲都唔創新，主要因為港人很多都太短視；即使宣稱自己為國際金融中心，但很多金融市場嘅基建或系統，都係因為見到海外地區已行之有效，然後至引入。咁咪同copycat冇分別？
余絲韻