市場熱線：洛鉬中長線持有

祖國唔止耕田有旱災，金融行業亦缺水，搞到成交亦縮咗一大截，「班水回朝」令到中資股沽壓沉重，尤其係民企股。不過，缺水只係短期現象，祖國同胞依然好捨得消費，兩隻內銷股百麗（01880）同安莉芳（01388）先後公布咗頭4個月嘅銷售數據，按年分別增長22%同24%，證明內需股仍係好景。

消費股強得有理

尋日亦有多間公司派成績表，聯想（00992）全年賺多1.1倍，好多人諗住iPad一出誰與爭鋒，但聯想證明自己頂得住。利信達（00738）全年賺多73%，國美（00493）首季賺多66%，金山軟件（03888）首季賺少25%，太平洋恩利（01174）中期賺少32%，買消費股始終有着數，零售股同珠寶股呢排表現跑贏大市事必有因。

雙匯畀「瘦肉精事件」搞到一鍋粥，尋日又傳雨潤（01068）出事，但雨潤尋日先跌5.4%後跌幅收窄至2.2%，應該唔係咁大鑊。不過，雨潤呢排亦係多事之秋，前排祖國傳媒吹佢擴充屠宰產能為咗呃政府補貼。傳媒打完雙匯順手打埋雨潤，但雨潤始終係實力股，低位唔怕買。

尋日上晝聽缸邊友提到兩宗懷疑烏龍交易，事緣中航信息（00696）二送一紅股及派發末期息均於尋日除淨，除淨價4.681元，誰知上晝市前「U」時段以5.5元成交咗26.3萬股，該股收報4.75元；另一隻係聯華（00980），十送八紅股連同末期息尋日除淨，除淨價18.714元，奇怪係上晝「U」時段有一手以32.95元成交，結果收報18.7元。係咪有人表錯情以為有平貨執，不得而知，但投資者買賣前實在有責任先了解清楚公司情況，免招損失。

美元同油金走勢係背馳，呢排油金回升，個別金屬股亦回勇，除咗有「高佬盛」唱好嘅江銅（00358）之外，洛陽鉬業（03993）亦走勢硬淨，周一跌到6.39元之後反彈，形成雙底，但股價亦喺7.2元附近有阻力。隻股早排被納入MSCI中國指數成分股，所以吸引資金捧場。

首季收入勝預期

洛鉬亦首次公布咗首季成績表，銷售收入14.6億人仔高過預期，賺2.67億人仔符預期，但毛利率由41.1%急跌到32.2%。唔使驚住，毛利率大跌係因為貿易業務快速增長，計落洛鉬今年PE稍低於20倍，同其他金屬股比較好似唔多吸引，但鉬屬於受保護資源，所以計估值其實合理，隻股短線可以喺6.4至7.2元之間炒上落，中長線應該有力突破，因為鉬價現處於較低水平，長線有較大上升空間。

戰報

JOYCE（00647）+9%

古晨本月十三日推介嘅JOYCE尋日高見0.89元，以當日低位0.82元上車計，最多賺近9%。

I.T（00999）+9%

小尾上周五吼中隻I.T，當日低位只係6.24元，尋日高位見6.8元，短短幾日已升近9%。

古勝