港交所（00388）行政總裁李小加每逢公開演講，總想帶出一啲訊息畀市場，唔知係咪為咗令大家容易明白，佢提出嘅口號都幾多創意。繼人民幣國際化有「三小步、兩大步」後，李小加尋日出席董事學會午餐會時，又提出香港要有三個信念要堅持，就係「有信心、具策略、求變」，佢盡量將訊息形象化，令大家容易記得，都算係用心良苦！
先講第一個信念──「信心」，李小加話好似上海崛起呢個現象，香港唔應該感到沮喪，因為兩者可以共存，加上香港有良好制度，資本市場仍有好大發展空間，所以港人要對自己有信心。第二個信念係「策略」，佢話中國依家已過渡至財富累積，錢一定要流出去，香港依家要做嘅唔係向內地爭取乜嘢優惠政策，而係要向中國提出，對佢哋重要而又可協助到國家嘅事，就好似讓香港發展人民幣離岸中心咁。
最後一個信念亦係佢最想帶出嘅訊息，就係香港必須要「求變」，佢承認過程會痛苦、唔開心，就好似延長交易時間咁，大家可能冇咗午飯時間，但有啲事係必須要做，香港依家正處於轉捩點，負擔唔起不改變嘅後果。
至於佢話嘅人民幣「三小步」，就係指「走出來」、「流動」及「回流」；「兩大步」就係指「增量」及「擴容」，但係要先做好市場基礎設施及風險管理等。
余絲韻