內地耐唔耐就有報道話，抽查結果發現某某食品或飲品被驗出對身體有害物質，絲絲聽到都好鬼驚，皆因依家好多食品都係內地生產。就算係旺旺（00151）咁出名，佢哋位於山東省濰坊市廠房生產嘅「旺旺仙貝」，之前就被國家質檢總局抽查驗出有大腸菌群，結果搞到一班跟開旺旺嘅分析員都好緊張，尋日紛紛致電旺旺問個究竟。據分析員引述旺旺高層話，公司已即時舉行內部會議，並且將整個生產及質檢過程由頭檢查到腳，希望搵到出事原因。
有分析員話，其實山東廠對旺旺嘅影響真係細到唔恨，佔收入都唔到1%，影響應該唔係咁大。睇番旺旺尋日嘅股價，唔跌不特止，仲反而升1.4%，有券商仲話，旺旺本月至將部分產品價格提高2%至5%，據稱加價嘅產品佔公司總體收入兩成咁多，怪唔得股價有得升喇！
余絲韻