世界盃正式開鑼，輪商特別為此搞搞新意思，順便為公司宣傳吓，瑞信就搞咗個「足球狂熱，一擊即中」模擬比賽，令投資者變身為「足球領隊」，挑選表現最好嘅窩輪、牛熊證「冧巴」，即係要搵到「最佳球員」。
絲絲Click入瑞信網站睇過呢個輪證模擬比賽，點知就發現咗「球王聰」呢個人。睇真啲，瑞信香港認股證及牛熊證銷售主管何啟聰（Ivan）與「球王聰」個樣都幾似喎，咁啱大家個名又有個「聰」字。不過當絲絲向Ivan求證時，佢竟然好似娛樂明星上身咁話：「哈哈，我唔回應呢個問題。我只可以講我睇波叻過落場踢波。」至於今屆世界盃嘅王者係邊隊？Ivan就話睇好巴西及阿根廷喎。
另一家輪商荷合都唔執輸，趁尋日世界盃掀開戰幔，喺證券行向客戶派發橙色兼印有荷蘭英文名嘅迷你足球。荷合股票衍生部認股證市場經理陳佩雯（Fiona）話，荷蘭足球可以令人諗起公司全名，同款足球已經畀佢哋掃晒，球迷想出街買都買唔到。Fiona話以技術嚟睇，今屆睇好巴西或西班牙捧盃，如果睇靚仔就熱捧意大利型男喎。
余絲韻