自從「XX飯局」式訪談節目勁受歡迎後，好多電視台都相繼推出類似節目，不過大部分都係局限本土性嘅訪問。華娛衞視去年推出嘅《CEO實話實幹》就突破咗本土框框，呢個由TOM集團（02383）首席執行官楊國猛做主持嘅訪談節目，由於邀得中港台三地知名人士接受訪問，自播出以嚟好受歡迎，有見及此，華娛決定食過翻尋味開拍第二季節目。
第一季節目咁受歡迎，第二季當然不敢怠慢，除咗台柱「猛哥」繼續做主持人，仲搵嚟台灣商周媒體集團執行長王文靜、本地女性資訊網站She.com嘅聯合創辦人楊鼎立等人做嘉賓主持。
仲有一位值得介紹嘅嘉賓主持，就係有「冰上女王」之稱嘅楊揚，佢除咗係中國首位冬季奧運會冠軍之外，佢喺近20年嘅運動生涯中共獲得59個世界冠軍，係迄今獲得世界冠軍最多嘅中國運動員；佢喺早前做咗國際奧委會委員，而且仲成立「北極星慈善基金」，令處於困境中嘅小朋友都可以享受運動嘅益處及樂趣。身兼多職嘅楊揚除咗會分享佢嘅奮鬥史外，更會談及佢與丈夫甜蜜如初嘅小秘訣，就係透過寫小字條向愛人表達心意，運動場上英姿凜凜嘅「冰上女王」都有柔情嘅一面㗎。
余絲韻