港股隨外圍反彈，恒指重上10日線，不過成交少得可憐，連600億都唔夠，似係乾挾多過真升。詩詩尋日按兵不動，光大國際（00257）作中線投資，就算逆市下跌亦一於少理。華億（00419）則作整固，既然坐住贏，坐定定再睇仲有無上升空間。對炒鬼嚟講，尋日港股雖然升過300點，但其實無啖好食，唔少股仔更逆市下跌，呢一浪調整或未完成，都係咪輕舉妄動。
中國稀土（00769）昨日升逾2%，睇番技術走勢，小圓底收集接近尾聲，快要突破再展升浪，值得留意。其實國家早於去年已對稀土行業作出戰略性規劃，作為業內較具規模的大型企業，中國稀土料可受惠，中長線可睇高一線。
雖然中稀去年業績未能成功扭虧，但行業已步入復甦期，今年大有機會重返○七年的盈利水平。近日稀土價格持續上升，主要因為早前在全球稀土價格下跌時，內地龍頭包鋼稀土曾數次限產保價，到今年四月初，包鋼稀土將所有稀土氧化物對外銷售價再次上調，顯示了該集團在對行業控制及產品定價權上的強勢。
基於全球對於稀土產品的需求已觸底回穩，當然有利中稀盈利表現。中稀於前年購併了興華稀土及東冶稀土，去年繼續積極擴充，估計對未來業績增長有頗大貢獻。
詩詩